28/07/2015

La cuatriada según Ruma Barbero

http://moyandolculu.com

Moyando'l culu ye la serie braniega de cómic del dibuxante y músicu Ruma Barbero. Vera, una neña madrilana con familia d'equí, ta en Xixón echando les vacaciones. Los sos amiguinos son l'axente "re-enculturizador", los que la envereden pel "asturian way of life". Esta vegada ye la cuatriada lo que-y tuerz el mexu a la probe Vera. Nun ye pa menos: ¡la cuatriada, pa quien lo entienda!

Gracies, Ruma, por alcordarte del xuegu tradicional en Moyando'l culu. Prestó.

27/07/2015

Na Fiesta'l Pastor

La Fiesta'l Pastor ye un finxu pa la tradición xugada d'Asturies. El tiru cuerda y la xubida a la Porra d'Enol son (pa min) les dos pieces principales d'esta romería-raspiacielos del mes de xunetu, ensin quita-y méritu a la carrera d'a caballu. Va dos años grabemos un programa de La Bolera nesta fiesta. Ta pa velu calcando equí.

Semeya: El Fielato y El Nora.
De la crónica de la Fiesta d'esti añu paguen muncho la pena les semeyes que fixo y asoleyó El Fielato. Nelles pescúdense fácil la fuercia y la verdá de lo que se xuega ellí tolos branos.

24/07/2015

Xugar a ciclistes (I)

Siempre que toi atendiendo pa una competición ciclista y, más tovía, cuando algamo'l bon vezu d'andar en bici un poco de siguío, viénenme les memories de cuando xugábemos a ciclistes de criúcos. Estremo tres formes de xugar a ciclistes, de la de más neñu a la de más mozu. Yeren los años 90 en La Xungarosa, Avilés (El Barrio de la Luz). La primera d'eses formes de xugar a ciclistes yera una corrida de chaples. Garrábemosles n'El México, El Alfil y n'otros chigres de la contorna. En metiéndoles en bolsu, díbemos pal container qu'había cerca l'empate de les cais Hernán Cortés y Francisco Pizarro, xusto au principiaba'l pobláu xitanu que s'allargaba ta Villalegre. Ellí, nun entemez de puxarra y porquería, atopábemos otres dos coses mui preciaes pa esti xuegu: del vidru y del xiz.

El vidru francíemoslo sapiándolo contra'l suelu ta facelo cachinos qu'arrascábemos contra dalguna peña pa ponelos romos y redondos, xusto a la midida de les chaples. El xiz, de planches de yelsu que tamién francíemos, valíanos pa pintar peles ceres el camín a percorrer. Nesti puntu, yá teníemos tres coses básiques pa facer una chapla ciclista, pero faltábanos una. D'un periódicu o de la revista Ciclismo a fondo, sacábemos les cares de los nuesos ciclistes favoritos. Pa los periódicos nun había problema: los mesmos chigres que nos daben chaples, dábennos númberos vieyos de La Voz de Avilés, La Nueva España, Marca... Pero, ¡ai amigu!, si queríemos semeya a color, lo más a mano yera retayala a escondidielles na biblioteca'l barriu, que yera au taba la Ciclismo a fondo del mes. En resultes: chapla + semeya + redondelín de vidru = ciclista fechu. Tamién ye verdá que-y metíemos un migayu plastilina (o un chicle) pa da-y más pesu y pa rematar meyor la xunta del vidru y la chapla, pa que nun s'esmangare si volquiaba.

Dicía enriba que colos cachinos de xiz pintábemos el percorríu, ¡qué percorríu! Altos de toles categoríes, revueltes a esgaya y un mecigayu de metes volantes, intergiros y esprinos especiales qu'espeyaba la nuesa pasión ciclista internacionalizada. Dacuando la etapa diba toa per un bordiellu, que daba más vértigu pero quitaba la polémica de les rayes. Otres vegaes, les más, el camín diba pela cera, con tola polémica de les rayes amburiando: ¡Fulanín ta fuera! ¡Mentira, toi picando! Pa los altos, aprovechábemos les cuestes de les ceres y según lo llargues o pindies, poníemos-yos les categoríes. Anque nun nos prestaben gran cosa, facíemos tamién etapes planes. Pa prestar, les contrarrelós, ¡qué nervios les contrarrelós! 

¿Y cómo xugábemos? ¡A cutes! Pa les etapes en llinia (les que nun son contrarrelós), desque'l primeru pasaba pela meta cuntábemos cuantos cutes de diferencia sacaba a los demás. Pero poníemos un tope d'espera pa nun lo facer mui llargo, que mialma los había bien chepos. Pémeque de normal el tope anti-chepos yera a 5 cutes, una midida intelixente pal bienvivir del propiu xuegu. El que ganaba la etapa tenía 0 cutes y los demás quedaben penalizaos colos cutes de más que fixeren.

Sicasí, nes contrarrelós cuntábense tolos cutes que gastaba cadún pa facer el percorríu y comparábense los resultaos. Al meyor poníemos-y 0 cutes y los demás quedaben colos cutes de más, igual que nes etapes en llinia. Too esto sumábase nuna xeneral, porque de normal igual echábemos 5 o 6 etapes. El premiu la montaña y les metes volantes (esprinos o intergiros) yeren por puntuación. Los altos puntiaben según la so categoría y les metes volantes yeren toes iguales. Si nun toi mal, dábemos puntos namás a los tres primeros que pasaben per cada cosa.

Teníemos una llibretina na que s'apuntaben tolos datos de les etapes y les sumes de cutes y puntos de cada clasificación. Alcuérdome cómo nos arredolábemos viendo los númberos d'aquelles fueyes y cómo facíemos llectures al altu la lleva del resultáu, al xeitu d'un speaker. Ah, sí... ¡y tamién dibuxábemos los perfiles de les etapes naquella llibretina!

Xente habíalo mui fino pa cutir la chapla, pero habíalo igual de fino pa dibuxar los percorríos en suelu, p'apuntar na llibreta, pa facer de speaker y pa iguar les chaples (sí, y pa mangar los retayos a color na revista de la biblioteca). Naide nun yera curiosu pa toles facetes y toos teníemos una o dos facetes nes que rescamplar, asina qu'a tol mundu-y prestaba pola vida.

Pémeque siendo más pequeñinos xugáremos a la versión más tradicional del xuegu, una corrida cenciella de chaplones, pero'l ciclismu garrónos la neñez pela metada y el productu del amiestu foi más o menos esti xuegu qu'escribí equí. Datu: nun ta de más esclariar qu'Induráin nun trunfaba na nuesa plazoleta, vese que yéremos toos romingeristes y del CLAS.

20/07/2015

Trubia 1909

Va 106 años sabíen bien a qué se dedicar: bolos (tamién batiente), remu y baille. Too en xunto nes mesmes fiestes d'una tarde de branu: un destiláu d'etnomotricidá como yá nun s'atopa güei. Cuéntalo El Publicador de Xixón.
Anuncia del eventu n'El Publicador del 27/08/1909
Númberu del periódicu nel qu'apaez esta nota.

"TRUBIA. El próximo domingo se celebrará la tradicional romería del Carmen de Nalón*, la cual promete estar concurridísima, a juzgar por los preparativos que se están llevando a cabo por la comisión encargada de su organización (…). A las dos de la tarde tendrá lugar el concurso de bolos y batiente, en los que tomará parte el conocido jugador «Pinín», el cual ya está provisto de alpargatas de goma, construidas por un famoso zapatero de la localidad. Concluído el concurso se celebrarán las regatas de lanchas en el río Nalón, que partirán desde el pozo denominado La Felguera hasta el Cortallo (...). El resto de la tarde seguirán las gerandillas y alegres bailes donde los romeros tendrán ancho campo para sus aficiones (...)"
(*) Datu: Nalón ye un barriu de Trubia.

19/07/2015

Xugadores de la tradición: Sergio de L'Americanu

(Artículu espublizáu en Les Noticies col títulu Los xuegos de siempre, nel techu d'Asturies. 08/12/2011)

La Casa l'Americanu recibe cola so antoxana abierta y llimpia, preparada pal hibiernu rigorosu que tolos años anubre les cais d'El Puertu con tonelaes de ñeve. Los mil quinientos metros d'esti llugar del conceyu de Cangas del Narcea determinen clima y paisaxe, y clima y paisaxe determinen el ser d'esta xente candial y abierto, axetivos-antídotu pal fríu y l'aislamientu. Sergio espérame tres del horru, nun patiu de grava nel que sigue dominando la pizarra. Vengo a falar de xuegos antiguos con él y él sábelo. Poro, namás llegar salúdame con una colección de barres de fierro que nos va valir pa echar a “parl.lotiar” de la importancia qu'equí tuvieren los concursos de fuerza, nesti ámbitu de pasu, güei amenorgáu pol espoxigue d'otres víes y medios de comunicación.

Xugar la barra, cuéntame, yera más qu'un pasatiempu n'El Puertu. Nun hai qu'escaecer que castellanos, extemeños, andaluces y portugueses yeren viaxeros comunes d'esta carretera y al pasu pel altu, na so venta, l'apueste y el negociu, cosa común. Asina que nun ha chocanos que dalguna disputa acabara resolviéndose tirando la barra lo más llueñe posible. O que nos díes de fiesta'l concursu de barristes d'El Puertu tuviera fama del Sil al Narcea.

Fernando Maestro (Muséu de Xuegos de Campo -Huesca-) retrata a Sergio xugando la barra.
Vamos ver un poco El Puertu. Falamos, ente lleenda y crónica histórica, de la palabra L.leitariegos, y como quien nun quier, averámonos a La L.laguna. Esti home, tovía mozu, enérxicu y trabayador, charra y pon escuela y nun lo sabe. Botánica, zooloxía, xeografía de lo humano y de lo físico... ye un sabiu nada resabíu, un paisanu célebre ensin querelo. Pel camín hai tiempu pa criticar con pros y contres, cásique con formes de manual d'estilu, lo que ye y lo que suponen la estación d'esquí, los tendíos llétricos, la vida ayena de delles coses que se van viendo nesti altísimu pueblu asturianu. Allaculló, pal llau del Cuetu, hai unos praos onde muncho se tien tirao a la cuerda. Diz Sergio que veníen equipos yá formaos de más p'allá de Vil.lablinu -seique, digo yo, de Babia o de Palacios- y que tamién subíen de Bimeda, Cibea, Val.láu y Carbachu. Aprovecho pa conocer la so visión sobre la rellación ente la xente de les dos lladeres y cuéntame qu'enxamás apreció la menor estridencia. “Compartimos cultura y fala”, diz, y rise, pero tamién entaína pa esclariar que los d'El Puertu son d'El Puertu, xente avezao a socorrer, a abrir la casa y abellugar, a mercar, a recatiar, a negociar.

Los xuegos d'equí nun yeren namás de puxar, como talo paez hástasa equí. Per eses mesmes llombes qu'asomen a la carretera tien habío carreres, según cuenta Sergio. La corrida, que ye como tamién s'apedillaba esta actividá, nun consistía n'otro qu'en correr a pie p'aportar primero que los demás a un sitiu determináu. O en doblar una peña, que vien a significar da-y la vuelta a un picu, desapaeciendo a la vista de los que taben n'El Puertu pa salir pel otru llau depués d'arrodialu. Asina demostrábase l'arte pa caminar per un tarrén garmosu y enllén d'incertidume, no que tien tola traza de ser un retu ente pastores, tan amigos ellos de probase. En Casa l'Americanu tiense memoria tamién d'otru xuegu propiu d'esi oficiu, el saltu, del que, hai que lo dicir bien claro, n'Asturies tamos certificando'l so desaniciu. Ayudaos por un palu más o menos llagu, elásticu o ríxidu y con poca carrera, los pastores pasaben portiellos bien altos dibuxando nel aire una xestualidá motriz que bien recuerda a los pertiguistes atléticos del programa olímpicu. Cosa de vaqueros yera esi xuegu d'aire medieval, el de la sortiya, y ye que pocos meyor qu'ellos sabíen montar a caballu y quedar cola cinta na daga a galope tendíu.

Sergio fai camín alredor de La L.laguna. Tres d'elli, Carlos Suari y Fernando Maestro.
Semeya de Francisco Álvarez Cadenas.
De vuelta pa casa, Sergio nun marafunda la oportunidá de presentame la bolera, al par de la carretera pela que pasa, reviráu, un Alsa. Apoderada pola bouza, hai que maxinar aú taben la piedra, la poya, les rayes. Falamos d'apuestes, de la lonxitú de les xornaes de bolos. Los guajes de güei llámenlo “al rei de la pista” pero nun saben qu'esi ye un métodu organizativu emplegáu en competiciones deportives primero incluso de que se llamaren deportives. N'El Puertu amañábense asina tamién mui davezu y Sergio diz recordar pareyes que, lliteralmente, xugaren de sol a sol n'aquella bolera, como si fora un portalgu, contra tolos viaxeros que cruciaben l'altu un día cualquiera de branu. Enantes de despidinos hebo tiempu pal embutíu de casa y el calorín del fueu, la ocasión de conocer la familia y los vezos. Na cuadra vieya, tresformada en cochera pa los usos d'agora, Sergio'l de Casa l'Americanu atesoraba la última demostración d'amor y respetu a la cultura de so. Ellí, nun requexu tocante al portón, un armariu repintáu milenta vegaes y restorcíu pol tiempu, protexe del escaezu un xuegu de bolos abundante y antiguu. Cinco boles y alredor de cincuenta bolos con más d'un sieglu de vida. Y digo vida y nun m'enquivoco.   

18/07/2015

La Bolera... ¡ta setiembre! (Alicia y Sara Rodríguez, xugadores de cuatriada)

Nes selmanes postreres de la primavera, nes 13 últimes, firmemos otres tantes entregues de La Bolera, el programa de los xuegos y esportes tradicionales asturianos de la TPA. Como davezu, en "TPA a la carta" pueden vese los d'esti añu y tamién tolos que fiximos desque entamemos, va dos añucos.

Tamos trabayando yá nos capítulos que van emitise de setiembre p'alantre, pero ta entós prestábame facer reconocencia de los y les protagonistes d'esti cachu primeru de temporada.

Alicia y Sara, xugadores de cuatriada. Equí'l "so" capítulu en La Bolera (07/06/2015)
Les hermanes Rodríguez, Sara y Alicia, encarnen un ideal de bon facer dientro y alredor de la bolera. La Peña El Berrón, de la que son, ye una cantera enllena proxectos de futuru nos qu'elles son exemplos a siguir.

17/07/2015

¡Toquilé!

¡Toquilé! Aporté a la maya. Toi salváu. Y ente que'l xuegu remata y non, falamos d'estudialu -el xuegu-, d'ensiñalu, ¡de xugalu! ¡Toquilé!

Diz el Diccionariu de l'Academia de la Llingua Asturiana:
toquilé: interx. *que s’usa nel xuegu de neños del esconderite p’avisar de que tán a salvu.